سبحان مغير الأحوال 💚
بعد ماكنا بنضرب أخماس في أسداس وقلقانين من إن اللحمة تعدي ال٥٠٠ جنيه في رمضان
إلا وبقدرة قادر وبعد إعلان فخامة الرئيس عن مشروع رأس الحكمة واللي من تداعياته نزول سعر الدولار والدهب والحديد وغيره وغيره
فجأة لقينا اسعار اللحمة بتنزل بشكل متسارع وسعر كيلو اللحمة بعد ما وصل ٤٥٠ جنيه بقى النهاردة وبناء على آخر سعر في السوق ٣٥٠ جنيه وتوقعاتي إنه هيكمل في الإنخفاض ل ٣٠٠ جنيه خلال شهر رمضان المبارك إن شاءالله
عايز تعرف إيه اللي حصل
هقولك
اللي كنا بنعاني منه من فترة هو قلة العجول الحية في السوق وده اللي كان بيخلي الجزار وعلشان يفضل فاتح محله بشكل يومي يضطر يشتري عجول حتى لو بالغالي وطبعاً بيحملها على الزبون الغلبان
وعلشان كده كنا بنشوف كل يوم سعر أعلى للحمة
وللأسف وكعادة بعض التجار الجشعين واللي بينشطوا في الأزمات بدأوا يخزنوا في العجول في مزارعهم ويطلع منها بعدد محدود خالص اللي يمشي بيه مصاريف مزرعته لأنه عارف كويس إنه لو صبر لتاني يوم هيبيع بزيادة في السعر فكانوا بيتقلوا قوي في بيع بضاعتهم للسوق
وفجأة يتم الإعلان عن مشروع رأس الحكمة وسعر الدولار بينهار في السوق
كل تاجر من دول بقى خايف ليخسر في العجول اللي مخزنها وتقلان في بيعها
ف بقى بيطلع اللي عنده ويحاول يخلص منه قبل ما خسارته تزيد مع نزول الأسعار اليومي في السوق
وبكده العجول اتوفرت في الاسواق وسعر كيلو القايم ( الحيوان الحي ) بعد ما كان فوق ال٢٠٠ جنيه نزل ل ١٧٠ جنيه حالياً….. ولسه .
يعني النهاردة لو لقيت جزار بيبيع ب ٤٠٠ جنيه ماتشتريش منه لأنه بيستغلك
ربنا يحفظ بلدنا دايماً 🤲🙏
لو استفدت مني معلومة يبقى متنساش دعوة يوم الجمعة المبارك ولك بالمثل ان شاءالله