د. احمد حمدى الشبح
مدير ادارة المجازر والتفتيش على اللحوم بسوهاج
في الأيام الأخيرة بلاقي بوستات كتيرة على صفحات التواصل الإجتماعي بتتكلم عن ريحة وحشة أو لون مش طبيعي ظهر في اللحمة أثناء الطبخ وفورا التفسير منهم بيكون إنها لحوم حمير.
طبعاً ده مش صح خالص.
لأن لحمة الحمير لو متعلقة عند للجزار أنت نفسك مش هتشتريها لأن لونها بيكون أسود ودهونها أصفر نحاسي
وكمان ريحتها لما بتتحط في النار ريحة مش وحشة وبس دي ريحة ممكن تطفشكم من البيت من كتر سوئها وشوربة لحوم الحمير بيبقى على سطحها بقع زيت أصفر.
ولذلك لحوم الحمير لو هيبيعوها فهتكون في صورة مصنعات زي المفروم مثلا.
أما بقى الشكاوى الكتير اللي بتتنشر خلال الفترة دي هي فعلاً حقيقة بس مش علشان إنها لحوم حمير.
لا
دي لأن فيه مرض اسمه الحمى القلاعيّة منتشر بشكل كبير في المواشي وبيأدي إلى تعبها ولما الجزار بيدبحها وهي تعبانة لحمتها بتكون مخزن للميكروبات والبكتريا الضارة واللي بتسبب فساد اللحوم دي وطبعا بيظهر في شكل ريحة وحشة ولون الشوربة بيغمق واللحمة لونها بيسود.
وبناشد كل الناس في حالة حدوث المشكلة دي معاه الاتجاه فوراً للجهات الآتية أو أيا منها
الطب البيطري
مباحث اتموين
مديرية التموين
مديرية الصحة
جهاز حماية المستهلك.
كمان بنصحكم تتجهو فورا للشكوى في نفس اليوم علشان الجزار ميتحججش إنها باظت عندك ولما تروح تشتكي خد معاك عينة من اللحمة النية مش المستوية علشان التسوية بتضيع معالم فساد اللحمة.
وبالنسبة لمحافظة سوهاح إحنا كإدارة المجازر والتفتيش على اللحوم بمديرية الطب البيطري مستعدين لاستقبال الشكاوي ٢٤ ساعة والتحرك الفوري حفاظا على حقوقكم وصحتكم