كتب/د. احمد حمدى
الفراخ البيضاء الأمهات (فراخ إنتاج البيض) بنشوفها كتير في محلات الفراخ وسعرها بيكون أرخص من فراخ التسمين المخصصة للأكل الآدمي .
وفي الأسواق المصرية بيتم عرض الفراخ الأمهات للمستهلك برغم إن ده ممنوع في الدول الأوربية
طيب ليه…. هقولك
الفراخ الأمهات تبدأ في إنتاج البيض عند عمر 18 إلى 20 أسبوع علشان تنتج بيض كبير الحجم بحيث تنتج الفرخة الواحدة من 160 إلى 200 بيضة سنوياً تحت الرعاية والتغذية الجيدة والتي تنشط إنتاج البيض وليس إنتاج اللحم.
وبعد سنة وشهرين يتوقف المبيض عن العمل وبيتم إعدام الفراخ دي في كل دول العالم إلا مصر لأن بيتم إعادة تنشيط المبيض (عملية القلش) بحيث يعمل 6 شهور أخرى وبكده يصل عمر الفرخة لسنتين تقريباً.
وطبعاً خلال الفترة الطويلة دي بتاخد في مضادات حيوية وبعض الادوية الاخرى ، ده غير إنه مع تقدم السن بيزيد محتوى الدهون على حساب المحتوى البروتيني والأنسجة بتبقى خشنة وبتاخد فترة من اكبر من أطول في التسوية وطبعاً القيمة الغذائية أقل بكتير من فراخ التسمين اللي عمرها مش بيتجاوز 40 يوم.
ملحوظة : الامهات (العتاقي) البلدي المتربية في المنزل مبتكونش طبعا واخدة كل كمية المضادات الحيوية ومركزات الاعلاف زي الفراخ البيضاء.
الخلاصة :
بلاش تشتري الفراخ العتاقي البيضاء علشان كمية الدهون اللي فيها كتيرة وقيمتها الغذائية أقل بكتير من فراخ التسمين ،ده غير انسجتها الخشنة ومدة التسوية الطويلة، ودورات الأدوية والتحصينات اللي واخداها كتيرة جداً.
وميغركش حجمها الكبير وسعرها الرخيص .